جس کی لاٹھی اس کی بھینس

چیف جسٹس ثاقب نثار نے بنی گالہ تجاوزات کیس کی سماعت کے دوران ریمارکس دیتے ہوئے کہا ہے کہ عمران خان سب سے پہلے اپنا گھر قانون کے دھارے میں لائیں اور سب سے پہلا جرمانہ بھی انھیں کو ادا کرنا ہوگا۔

خبر کے مطابق پیر کو چیف جسٹس کی سر براہی میں بنی گالہ تجاوزات کیس کی سماعت ہوئی، اس موقع پر ایڈیشنل اٹارنی جنرل نے کہا کہ سروے آف پاکستان نے کورنگ نالے کا سروے کرکے رپورٹ دی ہے کہ کورنگ نالے پر لوگوں نے تجاوزات قائم کر رکھی ہیں۔ اگر عدالت اجازت دے تو نا جائز قابضین سے اراضی وا گزار کرائی جائے۔

پاکستان کی بدقسمتی یہی رہی ہے کہ قانون بے بس اور لاچار لوگوں پر بلا تاخیر و تامل جاری ہوجاتا ہے جبکہ وہ تمام افراد جو کوئی نہ کوئی مضبوط سہارا رکھتے ہیں وہ قانون کی گرفت سے بچ نکلتے ہیں یا ان پر قانون کا کلہاڑا اس طرح نہیں چلتا جس بیدردی کے ساتھ غریب اور بے سہارا پر چلا دیا جاتا ہے۔

تجاوز کس کو کہا جاتا ہے؟۔ یہی کہ کوئی بھی شخص کسی بھی سرکاری یا ذاتی زمین پر کسی بھی قسم کی کوئی تعمیر کرکے قابض ہو جائے یا جس مکان، یا دکان کا وہ مالک ہو اس کی حدود سے آگے نکل کر یہ سمجھ بیٹھے کہ وہ قبضہ کی ہوئی ساری زمین کا اصل مالک ہے۔ اس قسم کی توسیع یا  ناجائزقبضہ تجاوز میں شمار ہوتا ہے اور حکومت کو اختیار ہوتا ہے کہ ایسے قابض سے قبضے کو جس طرح بھی ہو واگزار کرایا جائے تاکہ کسی اور کو ایسا کرنے کی ہمت نہ ہو سکے۔

اطلاع کے مطابق ایسی تمام تجاوزات کو مسمار کرنے کیلئے انتظامیہ حرکت میں آگئی ہے اور تجاوزات کو بھاری مشینری کی مدد سے مسمار کیا جارہا ہے۔

تجاوزات مسمار کرنے کا یہ سلسلہ مسلم لیگ ن کی حکومت سے شروع ہوا تھا جس کا تسلسل آج بھی بر قرار ہے۔ اس بحث سے ہٹ کر کہ تجاوزات کو مسمار کرنے کا یہ سلسلہ انسانی ہے یا غیر انسانی، یہاں میں یہ بات ضرور رکھنا چاہونگا کہ اس قسم کی کوئی بھی تعمیر کسی جادو کی چھڑی کا نتیجہ کبھی نہیں رہی ہوگی کہ بس چھڑی کو ہلایا گیا اور آناً فاناً گلیاں، سڑکیں، بازار، مکانات اور دکانیں وجود میں آگئیں۔ ان سب تعمیرات میں برس ہا برس لگ گئے ہونگے۔ سوال یہ پیدا ہوتا ہے کہ جب کسی نے بھی پہلی اینٹ رکھی تھی تو ذمہ داران کہاں غائب تھے؟۔ جب بستیاں کی بستیاں آباد ہو گئیں، بجلی پانی اور گیس تک کی سہولتیں بستیوں میں فراہم کردی گئیں، کاروبار عروج پر پہنچ گیا تو اچانک ذمے داروں کو یہ احساس کیوں ہوا کہ یہ سب ناجائز ہے اور قابضین سے قبضے چھڑانا ضروری ہو گیا۔ میں نے بستیاں کی بستیاں اور بازار کے بازار مسمار تو ہوتے متعدد بار دیکھے ہیں لیکن ان سب معاملات میں خواب غفلت میں پڑے ذمے داران کو سزا پاتے کبھی نہیں دیکھا جس کا سلسلہ آج بھی جاری ہے۔

کون نہیں جانتا کہ کسی کی ذاتی یا سرکاری زمین پر کسی بھی قسم کا قبضہ ممکن ہی نہیں۔ یہ صرف بڑی بڑی زمینوں کا معاملہ نہیں، بازاروں کے فٹ پاتھ، گلیوں کے کارنرز، آبادیوں کے خالی پلاٹ، کسی حد تک بڑے مکانوں کی دیواریں اور نالوں کے گرداگرد کی زمینیں قابضین قابو کر لیتے ہیں۔ ان کا انداز انگلی پکڑنے کا جیسا ہوتا ہے اور بعد میں نوبت  قبضے تک جا پہنچتی ہے۔ کیا ایسا سب کچھ بغیر کسی اشارہ ابرو کے ہوتا ہے؟۔ کیا اس کے پیچھے کوئی ادارہ نہیں ہوتا؟۔ کیا سارے ادارے نیند کی گولی کھائے ہوئے ہوتے ہیں؟۔

یہ سوچ غلط ہے کہ ادارے سوئے ہوئے اور غافل ہوتے ہیں۔ میرا مکان ایک نہایت پیچیدہ موڑ پر واقع تھا۔ میرے اندازے کے مطابق شاید ہی کوئی “شریف” محکمے کے فرد کا وہاں سے گزر ہوتا ہوگا۔ مکان کے باہر کچھ حصہ شاید منصوبے میں آنے سے رہ گیا تھا۔ بس اس جرم پر محلے والوں نے اسے کچرے خانے میں تبدیل کرنا شروع کردیا۔ میری روک ٹوک بھی کام نہ آئی تو میں نے اتنے حصے میں چارفٹ کی دیوار اٹھادی تاکہ گھر آلودگی سے اور گھر کے چھوٹے بڑے بیماری سے محفوظ رہیں۔ صبح کو نہ جانے کون کون سے محکمے والے آن موجود ہوئے اور اسے گرانے یا “زرضمانت” کا مطالبہ کیا۔ “زرضمانت” سے انکار پر دیواریں ڈھا دی گئیں۔ میں ملول نہیں خوش ہوا کہ ہمارے محکمے خواب غفلت کا شکار نہیں البتہ جب میں نے بیس بیس تیس تیس سال کے بنے شادی ہالوں کو مسمار ہوتے دیکھا جو بر لب سڑک بنے ہوئے تھے تو دل ٹوٹ گیا کہ میرا گھر جو نہ تو کسی شاہراہ عام پر تھا اور نہ ہی کسی اہم گلی کے موڑ پر، وہ تو محکمے والوں کو اگلے دن ہی دن نظر آگیا لیکن وہ شادی ہال جن کو ہزاروں لاکھوں آنکھیں ہر روز دیکھا کرتی تھیں وہ محکمے والوں کو بیس بیس سال تک نہیں دکھائی دیئے۔

یہ ہی نہیں، تجاوزات کی آڑ میں میں نے جس جس بستی، بازار یا ہالوں کو توڑتے پھوڑتے دیکھا ان میں بھی بہت سارے امتیازات کو ملحوظ خاطر نظر آئے۔ بستی توڑی گئی تو وہ بھی کبھی ساری کی ساری نہیں توڑی گئی اور بازار بھی سارے کے سارے نہیں توڑ پھوڑ دیئے گئے۔ پھر یہ بھی ہوا کہ وہ کسی نہ کسی شکل میں دوبارہ بھی اسی طرح آباد نظر آئے۔ خاص طور سے فٹ پاتھوں پر قائم تجاوزات کو تو کچھ ہی عرصے میں اسی طرح آباد دیکھا گیا جس طرح وہ ڈھائے جانے سے قبل آباد و بارونق تھیں۔

بات نکلتی ہے تو خود بخود دور تلک چلی جاتی ہے۔ بات بنی گالہ پر قائم ایسی بستیوں کی تھی جس کی حدود یا تو حد مقرر سے تجاوز کر گئی تھیں یا پھر وہ تمام کی تمام ہی قبضہ کرکے تعمیر کی گئی تھیں۔ سپریم کورٹ کے احکامات کے مطابق ایسی تمام تجاوزات کو نہ صرف ڈھا دیا جانا قرار پایا تھا بلکہ اس پر عمل درآمد بھی کیا جا رہا تھا۔

یہاں مجھے دو سوال کرنے ہیں۔ ایک تو یہ کہ برس ہا برس سے یہ عمل انتظامیہ کی ناک کے نیچے ہورہا تھا تو انتظامیہ ایسا سب کچھ کیسے دیکھتی اور برداشت کرتی رہی۔ کیا اس قسم کے فیصلے سے قبل یہ ضروری نہیں تھا کہ انتظامیہ کے ذمہ داروں کو سر عام سزائیں سنائے جانے کا حکم دیا جاتا تاکہ آئیندہ کیلئے اس طرح کی غفلت کا مظاہرہ کرنے کی کسی کو جرات نہ ہو پاتی۔ دوسری بات یہ کرنی تھی کہ جرم کا ارتکاب خواہ بے بس کرے یا بہت بااختیار، سزا سب کیلئے ایک جیسی ہی ہونی چاہیے تھی۔

بنی گالہ کی تجاوزات کے خلاف درخواست خود عمران خان کی جانب سے دی گئی تھی جو اس وقت ملک کے وزیر اعظم بھی ہیں اور تعجب کی بات یہ ہے وہ خود اس معاملے میں قانون کی زد میں آتے ہیں۔

جو جو املاک بھی قانون کی زد میں آئی ہوئی ہیں ان سب پر حکومتی مشینری پل پڑی ہے اور کسی رد و کد کے بغیر ان کو مسمار کرنے پر تلی ہوئی ہے لیکن وہی قانون عمران خان، وزیراعظم پاکستان کیلئے حرکت میں نہیں آیا بلکہ ان پر صرف جرمانہ ادا کرنے کا کہا گیا ہے۔ یہاں سوال یہ پیدا ہوتا ہے کہ اگر وزیراعظم پاکستان پر صرف جرمانہ ادا کرنے کے بعد ان کی پراپرٹی “حلال” ہو سکتی ہے تو باقی قابضین پر جرمانہ ادا کرکے ان کی زندگی بھر کی جمع پونجی کو “حلال” کیوں نہیں کیا جاسکتا؟۔ اسی ضمن میں ایک سوال یہ بھی جنم لیتا ہے کہ عدالت کا حکم اور حکم میں جاری سزا سزا ہی ہوتی ہے۔ جرمانے کا مطلب بہت ہی کم درجے کی سزا بھی ہو تو سزا تو ہوئی۔ ایک سابق وزیر اعظم کو اتنا ہی کہا گیا تھا کہ وہ عدالت کی برخاستگی تک عدالت میں ہی رہے گا۔ دیکھا جائے تو بظاہر یہ کوئی سزا تو نہیں تھی لیکن محض اسی بنیاد پر اس وزیر اعظم کو نااہل قرار دے دیا گیا تھا۔ جرمانہ ادا کرنے کا حکم کیا اس زمرے میں شمار نہیں ہوتا؟۔ معمولی ہی سی سہی یہ سزا نہیں؟۔ کیا اس کو انصاف کا دہرا معیار تصور نہیں کیا جائے؟۔

جب تک کسی بھی ریاست میں بے بس و لاچار کا قانون اور صاحب اقتدار و اختیار کا قانون یکساں نہیں ہوگا اور سب کو انصاف کی آنکھ ایک جیسا نہیں دیکھے گی، یہ توقع رکھنا کہ ملک فلاح و بہبود کی جانب بڑھ سکے گا، ایک بہت بڑی بھول ہے۔

اپنے ہی شہریوں کی بستیوں کو پہلے تعمیر کرتے دیکھتے رہنا اور ذمے دار اداروں کا خاموش رہنا، پھر ایسے تمام ذمے داروں پر کسی بھی قسم کی کوئی فرد جرم عائد نہ کرنا اور بنے بنائے لاکھوں روپے مالیت کے مکانات کو کسی بھی ہچکچاہٹ کے بغیر بلڈوز کردینا میرے نزدیک سراسر جرم ہی نہیں ظلم بھی ہے۔

کراچی میں کوئی نالہ، کوئی سرکاری و ذاتی زمین، کوئی پہاڑی اور کوئی بھی کھیل کا میدان ایسا نہیں جو بھٹو دور سے لیکر تاحال ناجائز قابضین کی دست برد سے بچا ہوا ہو۔ ان میں سے 90 فیصد وہ علاقے ہیں جو قانونی طور پر ان کے حوالے کر دیئے گئے ہیں اور وہ ان بے ڈھنگی آبادیوں میں اپنی گزر اوقات کر رہے ہیں۔ جب کراچی میں ایسی ساری بستیوں کے رہائشیوں کو مالکانہ حقوق دیئے جاسکتے ہیں تو بنی گالہ کے رہائشیوں کو یہ حقوق کیوں نہیں مل سکتے؟۔

اگر قانون کی حکمرانی مقصود ہے تو وہ ملک کے کونے کونے میں یکساں ہونی چاہیے اور سب کیلئے برابر ہونی چاہیے یا پھر اعلان کر دیا جائے کہ بھینس اسی کی ہوگی جس کے ہاتھ میں لاٹھی ہوگی یا لاٹھی والا ہاتھ ہوگا۔